بقلم / خالد الترامسي
يا خبر بقي بعد كل الهري بتاعي وقاعد عمال أنفخ في ناس وخليناهم أبطال وبدنجان يطلع إن الجزيرتين كان بيتربي عليهم معيز وخرفان ، هو الواد أحمس مكنش مسيطر ولا أيه ، دا إحنا كنا راكبين البحر من أيام الفراعنة ولا نسيتوا إن الفراعنة نقشين علي معابدهم صورا للمراكب والصنادل ولا كان كل ده تخيلات وخزعبلات وهواجس ، في الوقت إللي أساسا شبه الجزيرة العربية مكنش فيها بشر ولو حتي كان فيها ناس كانوا ناس عادية جدا لا يفقهوا شيئ في أي شيئ يمكن الصوماليين عندهم رقي عنهم بمراحل ، ده المنطق اللي بيقول كدة ، قبل لغة الحسابات والقياسات والبيسوهات جمع كلمة “بيسة ” أصل شكل السعوديين شممونا حاجة أبيضة ، والله مينفعش الكلام ده ، يلعن أبو الفقر والعوز إللي يخلينا نفرط في الأرض .
أظن الرسالة واضحة ، إحنا عاوزين تكذيب لكل إللي بيحصل ده لإما هتلاقوا أطفالنا إللي هما نسبياً أرقي من أجيلنا بمراحل جلهم أتشوك ” صدمة ” أه صدمة أنكل زيزو ومنعرفش نعالجهم تاني بعد كدة لأن الأولاد ممكن بعد كدة يتخيلوا إن مصر هتتفلت منهم حتة ورا حتة ، والمشكلة إن إللي بيقطع التورتاية معلم وحريف وبياخد الحتة الحلوة إللي فيها إللي كلها بهاريز وأم حسن وبدوية وكنتاكي ، لا نشيل كنتاكي ده مش تبعنا ده حتي الفراخ بتاعتو مدممة وتقرف وبياخدوا ضريبة مبيعات .
وإحنا زي الهبل قاعدين نحارب عشان شوية بقر يعيشوا وكل شوية مصدرين لينا مصر أم الدنيا وخالتها وعمتها من ٤٨ وجنودنا راحوا فطيس طيب إحنا بنحارب في سينا دلوقتي ليه طيب من سيبها لإسرائيل وخلاص هههههههههه أنا بهزر ، يا خسارتك يا عبد الودود يا اللي كنت قاعد عالحدود وبدافع عن أرض الكنانة .
الموضوع ميتعالجش بالوضع ده وسيبونا من الناس إللي قاعدة تبرر الموقف المصري الغريب والمستهجن ، ولعبة التحايل علي كامب ديفيد ومدييفيدش ، كلها خزعبلات وهجايص ، مهو من الأخر لما نكون مش قادرين نحمي أرضنا يبقي ملناش لازمة ، ونبيعها بقي بالقطعة ، أحسن ميجوا ويحتلوها ، صنافير وتيران مصريتين بنسبة كل أرقام الدنيا في المية ، وهتفضل مصرية ، دي جغرافية مكان وقبل كل ده تاريخ بيرصد وبيحكم وعمره مهيغفر لحد ، أنا بحب السيسي ومش ضده ، لكن هذا الموقف في هذا التوقيت مش كويس ولا محترم حتي لو دخل مصر المليارات وإستبدلوها بجبال من الذهب مينفعش لأن دي كرامة وطن في تاريخ وكما أسلفت مبيسبش حد .
طيب إنتوا بتحاكموا مبارك ليه ، عشان كان مثبت السعودية والملف كان مركون عالرف أظن الرجل ده المفروض الشعب المصري عن بكْرَة أبيه المفروض يرحولوا المشفي يقبله يديه وقدميه أن حافظ علي كل شبر في أرض هذا الوطن ولم يتركه منقوص السيادة ، دي طابا إللي مساحتها ” ١ ” علي “١١٣” من مساحة الجزيرتين، عملنا أفلام ومهرجانات عشان نستردهم من العدو الإسرائيلي ، قوم نيجي نسيب لهم جزيرتين كلها دهب عشان حجج واهية ، طيب ما مصر عايشة زي الفل من غير أم الجسر ، الموضوع برمته بايخ صح ؟ طيب نعمل إيه كلنا أمل في إن الريس يرفض موضوع اللجنة دي ولا الدولة مضت خلاص وقعت يعني ، دا حتي كلمةوقعت أسخم من كلمة مضت ، إنتوا أكيد وخدين بالكوا ” و ق ع ” ممكن بقي يكون وقع طيب حد يشيله
